Jako hnydomne naprawy k spěchowanju šulskeho serbskeho rěčneho a kulturneho kubłanja kaž tež w ramiku administratiwneho rewitalizowanja rěče namołwjetej so knježerstwje krajow Sakskeje a Braniborskeje,
- serbšćina ma so za serbsce maćernorěčnych jako połnohódna
maćeršćina a za němsce maćernorěčnych jako połnohódna druha cuza rěč připóznać kaž tež - we wšitkich šulach we woběmaj zwjazkowymaj krajomaj ma so posrědkowanje znajomosćow wo stawiznach, kulturje, identiće a rěči Serbow obligatorisce do wučbnych planow zapisać a jich přesadźenje zaručić,
- zjawnje k dispozicji stajić hodźace so statistiske daty
- wo ličbje we woběmaj zwjazkowymaj krajomaj tuchwilu aktiwnych wučerkow/wučerjow z předmjetom serbšćina, inkluziwnje wotwidźomnych wotchadow staroby dla w přichodnych dźesać lětach
- wo fachowych wučerjach, kotřiž w serbskej rěči wuwučować zamóža,
- wo ličbje w předmjeće serbšćina podatych wučbnych hodźinow,
- wo ličbje w předmjeće serbšćina wupadnjenych hodźinow,
- wo ličbje šulow, w kotrychž so w zańdźenych 5 lětach serbska wučba njeje zarjadowała, byrnjež přeće staršich předležało.
Dokładne wuhotowanje regulowacych zakonjow a postajenjow ma so ze Serbskim sejmom zhromadnje ze serbskimi fachowymi zwjazkami a potrjechenymi wothłosować.
Wyše toho podpěruje Serbski sejm žadanje župy Budyšin Domowiny za přewjedźenjom eksterneje ewaluacije serbskich poskitkow w sakskich šulach po braniborskim přikładźe.
Wopodstatnjenje:
Tuchwilu je dla wotpowědneho njepřipóznaća nawuknjenje serbskeje rěče na němskich gymnazijach njeatraktiwne, kaž tež přistup k serbskim gymnazijam poćežowane. Woboje znapřećiwja so šěrokej politiskej woli kaž tež w artiklu 6 a artiklu 25 sakskeje resp. braniborskeje wustawy kodifikowanej garantiji na aktiwne spěchowanje zdźerženja, dalewuwića a rewitalizacije serbskeje rěče.
Posrědkowanje wědy wo serbskej kulturje w sakskich a braniborskich šulach stajnje woteběra. To so znapřećiwja šěrokej politiskej woli wo mjezsobnym zrozumjenju mjez němskej a serbskej ludnosću.
Před krótkim přewjedźena eksterna ewaluacija serbskich poskitkow za primarny schodźenk w kraju Braniborska je wunjesła wažne dopóznaća, kotrež maja so tež wo situaciji w kraju Sakska zwěsćić a wozjewić.